Viss partane ikkje blir samde innan fristen, kan nærare 1 500 YS-medlemmar bli tatt ut i streik frå søndag 16. april. 

– Vi står fast på kravet om auka kjøpekraft når vi no går inn i mekling med NHO. Mange av medlemsgruppene våre har hatt ein stor nedgang i reallønna dei siste åra. Dette kan ikkje halde fram, seier Deltas nestleiar og forhandlingsleiar for Delta-medlemmane i NHO-området, Marit Solheim.

– Vi håpar sjølvsagt å unngå arbeidskonflikt, men dette er no opp til NHO. Etter to år med reallønnsnedgang er auka kjøpekraft eit heilt rimeleg krav. Medlemmane våre er grunnstamma i velferds-Norge. Det er på tide med eit ekstra lønnsløft til kvardagsheltane våre, seier Solheim. 

- Ein generell lønnsnedgang blir resultatet viss NHO ikkje innfrir krava. Det er ikkje vegen å gå for å sikre rekruttering til desse viktige yrka i velferds-Norge, seier Marit Solheim.

• Les også: Brot i forhandlingane mellom YS og NHO

Kan bli streik fra søndag

YS varsla tidlegare denne veka Riksmeklaren om plassfråtreding for 1 441 YS-medlemmar. Desse medlemmane blir tekne ut i streik frå byrjinga av arbeidstida søndag 16. april viss YS og NHO ikkje blir samde i helga.

– Eg ser fram til at vi kjem i gang med meklinga. Vi forventar ei heilt anna framdrift enn det vi erfarte under forhandlingane med NHO før påske, understrekar Deltas forhandlingsleiar Marit Solheim.

 – Vi er klare for streik viss vi ikkje oppnår eit resultat som treffer godt nok for medlemmane våre, seier ho.

I NHO-oppgjeret forhandlar YS på vegner av 16 000 medlemmar, organiserte i Delta, Negotia, Parat, Safe og Yrkestrafikkforbundet.

• Sjå kvar YS-medlemmer kan bli tekne ut streik frå søndag

Ingen av Deltas medlemmar innanfor NHO-området er tatt ut i streik i første omgang.

Dersom nokon av Deltas medlemmar skal takast ut i streik ved ei eventuell opptrapping vil kvar enkelt få beskjed.

• Følg med på lønnsoppgjeret på nettsidene til Delta